Die Weisheit der Schnitzel-Banker

«Tri, tra, trallala, dr Kasperli derf friener go»: So wurde die Finanzwelt in den Schnitzelbänken der Basler Fasnacht 2012 aufgespiesst.

Ein viele verbindendes Thema bot die UBS. Respektive deren Sorgen in London und der Rücktritt von Oswald Grübel

Ganzi Völker bruchts, Millardelecher z mache
Mir Schwyzer sinn vyyl effiziänter in so Sache
Für e Milliardeloch länggt logger, ohni Stress
Ei klaine Bängger z London, vo dr UBS
• Dr Uffgweggt

In Ängland ääne hett ain grisse
D UBS ganz gwaltig bschisse
Die Gselle sinn im diefschte Schloof
E kain meergt ebbis daas isch doof
Die liesse sich no s Hiirni stääle
Wenn s nit de maischte scho däät fääle
• Bebbi-Buebe

D UBS-Zyt vom Herr Grübel isch vrbyy
Jetzt luege sini Auge no glangwyylter dryy
Dr woori Grund erglääre mir jetzt d Psycholooge:
Dä haig sich z oft dr Schwyzer Tatort yynezooge
• Die Verlumpte

Jetzt hänn mir dänggt die UBS-Bängger hänn nyt gleert
Dr Sand in Kopf gsteggt oder umgekeert
Drby sueche die im Sand i mach e Wett
Das Gäld wo dr Adoboli in Sand gsetzt hett
• Die Haiggle

D UBS, het am Stägge ... Drägg,
2 Milliarde findet me nimm, die sinn glaub wägg.
Dr Grübel het welle, derfe oder so,
und dr Villiger tri tra trallala, tri tra trallala dr Kasperli
derf friener go oder so ...
• Kinschtler

Was ohne Umwege zu den Sorgen im Basler Haus Sarasin führt…

D UBS verlocht no zwai Milliarde mee
Dasch nüt, du sottsch mol mini Frau bim Shoppe gsee
Wass si so ussgit, das erfaar y immerhin
Syt si s Konto hett bi dr Bank Sarasin
• Die Verlumpte

D Bangg Saarasi het me verkauft - wie ieblig haisst s jetz spaare
d Safra will jo schliesslig satti Gwinn yyfaare
als Luxus kemme Faarbkopie nimmen in Betracht
wenn s syy muess wird vom Bildschirm halt e Foti gmacht
• Rätschbääse

Logischerweise bewegt auch das Schicksal des obersten Notenbanggers

D'Frau Hildebrand het ooni ihre Maa vorhär go frooge
Devisegschäft gmacht, doch die Sach isch dummerwyys uffgflooge.
Jetz isch si Ruef futsch, sälber schuld, mir hänn kai Mitlaid ghaa:
Wär isch so blöd und losst si Alti an sy Konto dra?
• Luuszäpfe

Noch dr UBS-Affääre gseet dr Griibel root und goot
Drwyyl dr Villiger vyyl williger vor d Bräss aane stoot
Är syg enddyscht und e weeneli druurig au
Immerhin suecht dää d Schuld nid bi sinere Frau
• Die Unerheerte

S Trio Blocher, Köppel, Somm isch ganz erreggt
Sy hänn bim Hildebrand am Schtägge Drägg entdeggt
Mir versteen das jo und dien drumm au nit muule
Jä, wo's vyyl Drägg git geen sich d'Säu halt gärn go suule.
• Babberlababb

Dr Philipp Hildebrand het si Job verloore
D Mainige göön ussenand in allne Foore
Nur dr Paabscht lächlet still, und dänggt sich ganz genau
Isch daas e Glügg hann yych kai Frau
• Die Haiggle

Dr Hildebrand dä isch zrugg drätte
Das het mi droffe wie dr Blitz
Wäär sell das Amt als näggscht's ussfille
Wäär wurdi basse uff dä Sitz

Mir än vernoo dr Seppi Platter
Bim Argumänt do bisch verreggt
Dä wurd ganz sicher no mee bschisse
Nur waiss dä halt wie me's versteggt
• Mac Väärs's

Schwarzgeld, Weissgeld? Finanzmarktstrategie aus Basler Sicht

Der Schwyzer Schwarzgäldmäärt, dä isch am implodiere
D'Bangge deerfe nimm dy Styyrsatz optimiere
Wennd aöso Gäld z'verstegge hesch und findsch kai Blatz
No inveschtiers am beschte unbemerggt in d'BAZ
• Babberlababb

E Bangg ooni Pointe isch fir d Katz
E Blatz ooni Bangg kai Banggeblatz
Wenn alles läär isch, liggt fir die wo Nyt hän, mee dinn
Ooni Sarasin und e-Wägg-elin
• Dr Storch

Auch auf die europäischen Fragen gibt es endlich handfeste Antworten

Rating Agentuure sind drzue beruefe
Wär Saich macht, dien si aabe stuefe
Händ Lischte mit Stroofpünkt für schlächts Verhalte
Genau esoo maches unseri Alte
• Nachtschwärmer

D'Grieche närve mi, will si huushalte, wie damals die alte Grieche,
d'Franzose närve mi, will sie immer no maine, si sige d'Sieche
und yber d'Italiäner isch mi Urtail kurz und knapp:
Wenn s'Schiff am Sinke isch, denn haue si ab.
• D'Schnapsbagge und dr Praggdikant

Noch ere liebesnacht mit Wyy fir sii und mii
huucht sii zäärtlig in mi Ohr «bisch super gsi»
Dini Mainig isch nit wichtig, sag y stuur
Es zellt nur d'Mainig vo der Rating-Agentur
• Babberlababb

«Wöschmaschyyneservice, Meier und Söhn.»
«Hier Sorbas ich hab mit Maschine Problem.»
«Herr Sorbas als Griech do mien Sie, dasch nid glooge
Vor em Sparprogramm zerscht d Frau Merkel go frooge.»
• Wyybuure

Zum Europa rette git Dytschland Gäld
Frankriich verkauft d'Schlösser in dr ganze Wält
Mir Schwiizer gän au ebbis draa
Vo uns könnet ihr gratis d FC Ziiri haa
• Blageeri

Unter dr Brugg do lääbe mir verlumpte Vier
Jä die Finanzgryyse, die isch nit unser Bier
Trotzdäm beweggt si ys, glaar dass dir ys versteen
Will mir jetzt ändligg als Trendsetter duuregeen
• Die Verlumpte